Tete no, na Adanko ne Dabodabo yɛ nnamfo pa ara. Na wɔyɛ biribiara bɔ mu, na wɔde wɔn sika nyinaa bɔ mu. Adanko na na ɔhwɛ wɔn sika no so.

Da koro bi, Dabodabo kɔɔ Adanko hɔ. Ɔkae sɛ, "Me yɔnko Adanko, merebɛgye sika no bi ɛfiri sɛ merekɔware". Adanko ka kyerɛɛ Dabodabo sɛ, ɔde sika no nyinaa ayɛ n'ade ma asa. Asɛm a Adanko kae yi maa Dabodabo ho dwiriw no yiye. Adanko san ka kaa ho sɛ, ɔnnim na ɔbɔ sika no so bio a, ɔbɛhwe no hwetɔre. Dabodabo anka hwee na ɔkɔɔ so ne Adanko yɛɛ Ayɔnkofo

Da bi, Dabodabo ka kyerɛɛ Adanko sɛ, wahu sika kɔkɔɔ bi sɛ ɛhyɛ dua bi ase wɔ nsunoa nohɔa. Wɔyɛɛ adwene sɛ wɔbɛkɔ akɔfa na ama wɔayɛ asikafo. Esiane sɛ na Adanko nnim asuaguare nti, Dabodabo de no tenaa n'akyi hyɛɛ ase sɛ wɔretwa asu no. Woduu ebun mu no, Dabodabo ka kyerɛɛ Adanko sɛ ɔyɛ odifudepɛfo a ɔnka nokware. Ɔde kaa ho sɛ, sɛ Adanko anhyɛ no bɔ sɛ ɔde sika no mu fa bɛma no a, obeyi no ato asu no mu. Adanko sui, na ɔsan paa Dabodabo kyɛw. Ɔhyɛɛ Dabodabo bɔ bio sɛ sɛ ɔsan de no kɔ a, ɔde ne sika nyinaa bɛma no. Dabodabo penee so. Wɔsan duu fie pɛ, Adanko dii ne bɔhyɛ so.

Ɛbɛto da na akokoa anyin! Ama ɔbra ne no adi no yiye, Enti, onipa nua, kae da bi.

Ɛbɛto da na oguan adan. Ama nkwan ayɛ dɛ, ama Tano asaw bi, Enti, onipa nua, kae da bi.

Ɛbɛto da ewim abae, Ama dufɔkye ayɛ gya, Enti, Onipa nua, kae dabi.

Ɛbɛto da na onnibie anya nua, Ama ankonam anya akwannua, Enti, onipa nua, kae da bi.

Ɛbɛto da na kwaterekwa anya ntama, Ama yɛrepɛ ne din atie, Enti, onipa nua, kae da bi.

Ɛbɛto da na onipa anya ne baabi kɔ, Ama ɔkasafo adan mum, Enti, onipa nua, susuw biribi.

Fa nsɛmfua a edidi so yi mu biara hyɛ faako a wɔagyaw no: sɛ, tumi, ɔyamyefo, me, adɛn.

Fa nsɛmfua a wɔasensan ase yi mu biara kɔ twam kabea mu.

Kyerɛw nsɛmfua a wɔasensan ase no mu biara abirabɔ.